Cittaviśuddhiprakaraṇa
Technical Details
Cittaviśuddhiprakaraṇa
[anādinidhanaṃ śāntaṃ bhāvābhāvavivarjitam|
nirvikalpaṃ nirālambamanavasthitamadvayam||1||
adṛṣṭāntamanākhyānamacintyamanidarśanam|
anāśrayāpratiṣṭhānaṃ nirvikāramasaṃskṛtam||2||
sarveṣāmāśrayaṃ buddhaṃ karuṇāmayavigraham|
nānādhimuktasattvānāṃ nānopāyapradarśakam||3||
mahārāgaṃ namaskṛtya padmanarteśvaraṃ prabhum|
iha stokaṃ pravakṣyāmi svacittapratyavekṣaṇāt||4||
yogācārasya nayataḥ sarvameva suniścitam|
tatsarvamiha vaktavyaṃ tasmādevatsamācaret||5||]
yena yena hi bandhyante jantavo raudrakarmaṇā|
sopāyena tu tenaiva mucyante bhavabandhanāt||6||
[viśuddhereva sattvasya viśuddhaṃ jāyate phalam]|
mahāyāne suvispaṣṭamuktametatsuvistaram||7||
dharmapudgalanairātmyaṃ cittamātraṃ jagau muniḥ|
tato'pi sarvamutpannamāgamātyanukūlakam||8||
bhāvagrāhagrahāveśagṛhītānpraticoditaḥ|
āgame'pi hi suvyakto vistaraḥ karuṇātmanā||9||
manaḥpūrvaṅgamā dharmā manaḥśreṣṭhā manojavāḥ|
manasā hi prasannena bhāṣate vā karoti vā||10||
svapitā bhikṣuṇā vṛddhaḥ śīghraṃ gaccheti preritaḥ|
patanācca mṛte tasminnānantaryeṇa yujyate||11||
sumlānenārhatādioṣṭo maṅgalaṃ paripīḍaya|
upasthāyakabhikṣuḥ sa mṛte tasminna doṣabhāk||12||
andhasaṃjñayā nāndhāṃstu mārayandoṣamaśrute|
ityuktaṃ vinaye vyaktaṃ na doṣo'duṣṭacetasām||13||
na stūpakhanane doṣastatsaṃskāradhiyā yataḥ|
kevalaṃ puṇyarāśiḥ syādupānantaryakāraṇāt||14||
upānadyugalaṃ dattvā munermūrdhni śubhāśayāt|
apanīya tathā cāndho rājyaṃ phalamavāpnutaḥ||15||
tasmādāśayamūlā hi pāpapuṇyavyavasthitiḥ|
ityuktamāgame yasmānnāpattiḥ śubhacetasām||16||
svādhidaivatayogātmā jagadarthakvatodyamaḥ|
bhuñjāno viṣayān yogī mucyate na ca lipyate||17||
yathaiva viṣatattvajño viṣamālokya bhakṣayan|
kevalaṃ muhyate nāsau rogamuktaśca jāyate||18||
māyāmarīcigandharvanagarasvaprasannibham|
jagatsarvaṃ samālokya kiṃ kathaṃ kena bhujyate||19||
bālā rajyanti rūpeṣu vairāgyaṃ yānti madhyamāḥ|
svabhāvajñā vimucyante rūpasyottamabuddhayaḥ||20||
vicintya samayaṃ sarvaṃ devatāpūjanāvidhim|
śuddhamālokya niḥśaṅkaṃ bhoktavyaṃ mantracoditam||21||
śodhyaṃ bodhyaṃ tathā dīpyamakṣaratrayayogataḥ|
aṅguṣṭhānāmikāgrābhyāṃ prīṇayecca tathāgatān||22||
yatsatyamiti bālānāṃ tanmithyā khalu yoginām|
gacchannantamanenaiva na baddho na ca mucyate||23||
saṃsāraṃ caiva nirvāṇaṃ manyante'tattvadarśinaḥ|
na saṃsāraṃ na nirvāṇaṃ manyante'tattvadarśinaḥ||24||
vikalpo hi mahāgrāhaḥ saṃsārodadhipātakaḥ|
avikalpā mahātmāno mucyante bhavabandhanāt||25||
śaṅkāviṣeṇa bādhyante viṣeṇeva pṛthagjanāḥ|
tāmevotkhātya nirmūlaṃ vicaretkaruṇātmakaḥ||26||
yathaiva sphaṭikaḥ svacchaḥ pararāgeṇa rajyate|
tathaiva cittaratnaṃ tu kalpanārāgarañjitam||27||
prakṛtyā kalpanārāgairviviktaṃ cittaratnakam|
ādiśuddhamanutpannaṃ niḥsvabhāvamanāvilam||28||
tattadyatnena kartavyaṃ yadyadbālairvigarhitam|
svādhidaivatayogena cittanirmalakāraṇāt||29||
rāgāgniviṣasaṃmugdhā yogināṃ śubhacetasā|
kāmitāḥ khalu kāminyaḥ kāmamokṣaphalāvahāḥ||30||
yathā svagarūḍaṃ dhyātvā viṣamākṛṣya saṃpiban|
karoti nirviṣaṃ sādhyaṃ na viṣeṇābhibhūyate||31||
dvādaśayojanavyāsaṃ cakraṃ vai śirasi bhramat|
bodhicittaṃ samutpādya apanītamiti śrutiḥ||32||
bodhicittaṃ samutpādya sambodhau kṛtacetasā|
tatrāsti yanna kartavyaṃ jagadudvaraṇāśayā||33||
ādiśuddhamanutpannaṃ niḥsvabhāvamanāvilam|
jagadbhāvena sampaśyanna baddho na ca mucyate||34||
vicintya vidhivadyogī devatāguṇavistaram|
rajyate rāgacittena rāgabhogeṇa mucyate||35||
kiṃ kurmaḥ kutra vai labhyā vicitrā bhāvaśaktayaḥ|
viṣākrānto yathā kaścidviṣeṇaiva tu nirviṣaḥ||36||
karṇājjalaṃ jalenaiva kaṇṭakenaiva kaṇṭakam|
rāgeṇaiva tathārāgamudvaranti maṇīṣiṇaḥ||37||
yathaiva rajako vastraṃ malenaiva tu nirmalam|
kuryādvijñastathātmānaṃ malenaiva tu nirmalam||38||
yathā bhavati saṃśuddho rajonirghṛṣṭadarpaṇaḥ|
sevitastu tathā vijñairdoṣo doṣavināśanaḥ||39||
lohapiṇḍo jale kṣipto majjatyeva tu kevalam|
pātrīkṛto sa evāndhaṃ tārayettarati svayam||40||
tavdatpātrīkṛtaṃ cittaṃ prajñopāyavidhānataḥ|
bhuñjāno mucyate kāmo mocayatyaparānapi||41||
durvijñaiḥ sevitaḥ kāmaḥ kāmo bhavati bandhanam|
sa eva sevito vijñaiḥ kāmo mokṣaprasādhakaḥ||42||
prasiddhaṃ sakale loke kṣīraṃ viṣavināśanam|
tadeva phaṇibhiḥ pītaṃ sutarāṃ viṣavardhanam||43||
jale kṣīraṃ yathāviṣṭaṃ haṃso pibati paṇḍitaḥ|
saviṣān viṣāyāṃstadvad bhuktvā muktaśca paṇḍitaḥ||44||
yathaiva vidhivadbhuktaṃ viṣamapyamṛtāyate|
durbhuktaṃ ghṛtapūrādi bālānāntu viṣāyate||45||
idameva hi yaccittaṃ śodhitaṃ hetubhiḥ śubhaiḥ|
nirvikalpaṃ nirālambaṃ bhāti prakṛtinirmalam||46||
yathā vahniḥ kṛśopyeṣa tailavartyādisaṃskṛtaḥ|
dīpo nirmalaniṣkampaḥ sthirastimiranāśanaḥ||47||
vaṭabījaṃ yathā sūkṣmaṃ sahakārasamanvitam|
śākhāmūlaphalopetaṃ mahāvṛkṣavidhāyakam||48||
haridrācūrṇasaṃyogādvarṇāntaramiti smṛtam|
prajñopāyasamāyogāddharmadhātuṃ tathā viduḥ||49||
ghṛtaṃ ca madhusaṃyuktaṃ samāṃśaṃ viṣatāṃ vrajet|
tadeva vidhivadbhuiktamutkṛṣṭaṃ tu rasāyanam||50||
rasaghṛṣṭaṃ yathā tāmraṃ nirdoṣaṃ kāñcanaṃ bhavet|
jñānaśuddhyā tathā kleśāḥ samyak kalyāṇakārakāḥ||51||
hīnayānābhirūḍhānāṃ mṛtyuśaṅkā pade pade|
saṃgrāmajayacittastu dūra eva vyavasthitaḥ||52||
mahāyānābhirūḍhastu karuṇādharmavarmitaḥ|
prajñātantudhanurbāṇo jagaduḍvaraṇāśayaḥ||53||
mahāsattvo mahopāyaḥ sthirabudviratandritaḥ|
jitvā dustarasaṅgrāmaṃ tārayedaparānapi||54||
paśavo'pi hi kliśyante svārthamātraparāyaṇāḥ|
jagadarthavidhātāro dhanyāste viralā janāḥ||55||
śītavātādiduḥkhāni sahante svārthalampaṭāḥ|
jagadarthapravṛttāste na sahante kathaṃ nu te||56||
nārakāṇyapi duḥkhāni soḍhavyāni kṛpālubhiḥ|
śītavātādiduḥkhāni kastānyapi vicārayet||57||
na kaṣṭakalpanāṃ kuryānnopavāsena ca kriyām|
snānaṃ śaucaṃ na caivātra grāmadharmaṃ vivarjayet||58||
nakhadantāsthimajjānaḥ pituḥ śukravikārajāḥ|
māṃsaśoṇitakeśādi mātṛśoṇitasambhavam||59||
itthamaśucisambhūtaḥ piṇḍo yo'śucipūritaḥ|
kathaṃ saṃstādṛśaḥ kāyo gaṅgāsnānena śudhyati||60||
na hyaśucirghaṭastoyaiḥ kṣālito'pi punaḥ punaḥ|
tadvadaśucisampūrṇaḥ piṇḍo'pi na viśudhyati||61||
pratarannapi gaṅgāyāṃ naiva śvā śuddhimarhati|
taddadvarmadhiyāṃ puṃsāṃ tīrthasnānaṃ tu niṣphalam||62||
dharmo yadi bhavetsnānātkaivartānāṃ kṛtārthatā|
naktandivaṃ jalasthānāṃ matsyādīnāṃ tu kā kathā||63||
pāpakṣayo'pi snānena naiva syāditi niścayaḥ|
yato rāgādivṛddhistu dṛśyate tīrthasevinām||64||
rāgo dveṣaśca mohaśca īrṣyā tṛṣṇā ca sarvadā|
pāpānāṃ mūlamākhyātaṃ naiṣāṃ snānena śodhanam||65||
ātmātmīyagrahādete sambhavantīha janminaḥ|
avidyāhetukaḥ so'pi sāvidyā bhrāntiriṣyate||66||
raupyabuddhiryathā śuktau śuktidṛṣṭau nivartate|
nairātmyadarśanātsāpi nirmūlamavasīdati||67||
sarpabuddhiryathā rajjau rajjudṛṣṭau nivartate|
sarpabuddhiḥ punastatra naiva syādiha janmani||68||
sattvabuddhistathātrāpi vajrajñānānnivartate|
na bhāvaḥ sambhavettatra dagdhabīja ivāṅkuraḥ||69||
nairātmyaśucisaṅgātaḥ piṇḍaḥ prakṛtinirmalaḥ|
tasya santāpane dharmaḥ kaṣṭaṃ bālairvikalpitaḥ||70||
candrodayavyayañjāpi apekṣya tithikalpanā|
sūryodayavyayenāpi divārātrivyavasthitiḥ||71||
pūrvādivyavahāro'pi kalpanāpekṣayā kṛtaḥ|
grahanakṣatrarāśyādi sarvalokairvikalpitam||72||
śītoṣṇavarṣaṇāpekṣā tathaiva ṛtukalpanā|
svakarmaphalabhogo'yaṃ śubhāśubhagrahoditaḥ||73||
avidyākardamāliptaṃ cittacintāmaṇiṃ pumān|
pravṛttaḥ kṣālituṃ vidvān ko'vidyāṃ vṛṃhayetpunaḥ||74||
na grahatithinakṣatradeśakālādyapekṣaṇam|
viharennirvikalpastu nirnimittamaśaṅkitaḥ||75||
yadyadindriyamārgatvaṃ yāyāttattatsvabhāvataḥ|
susamāhitayogena sarvaṃ buddhamayaṃ vadet||76||
cakṣurvairocano buddhaḥ śravaṇaṃ vajrasūryakaḥ|
ghrāṇaṃ ca paramāśvastu padmanarteśvaro mukham||77||
kāyaḥ śrīheruko rājā vajrasattvaśca mānasam|
evaṃ samyak sadā yogī vicaretkaruṇātmakaḥ||78||
siddhāntī nirvikalpo'sau sthirakalpastu dhīdhanaḥ|
yatheṣṭaceṣṭāvyāpāraḥ sarvabhuk sarvakṛttathā||79||
sarvakāmakriyākārī yathārucitaceṣṭitaḥ|
utthito vā niṣaṇo vā caṅkramanvā svapaṃstathā||80||
amaṇḍalapraviṣṭo vā sarvāvaraṇavānapi|
svādhidaivatayogātmā mandapuṇyo'pi sidhyati||81||
anena sarvasauritvaṃ sarvabuddhatvameva vā|
janmanīhaiva tattvajñaḥ samprāpnoti na saṃśayaḥ||82||
yathā prākṛtalokena yogiloko na bādhyate|
bādhyante dhīviśeṣeṇa yogino'pyuttarottaraiḥ||83||
mahāprajñāmahopāyamahākṛpādhimokṣataḥ|
mahāyānasamuddiṣṭaṃ mahāsattvasya gocaram||84||
yatkalpānāmasaṃkhyeyairna prāptaṃ bahubhirmatam|
janmanyatraiva buddhatvaṃ prāpyate nātra saṃśayaḥ||85||
mahāyānasya māhātmyaṃ puṇyajñānena sambhṛtam|
sarvajñatvaṃ padaṃ ramyaṃ sadyo janmani labhyate||86||
āgamaśruticintā tu mahāyāne na gṛhyate|
āśayānuśayābhedād yānābhedaḥ prakāśyate||87||
anya evādhimokṣo'yaṃ tathānyā bodhicārikā|
anyā cittaviśuddhiśca phalamandhadihocyate||88||
samīpe nirmalādarśe rūpaṃ nirmalacakṣuṣaḥ|
yathā bhāti suvispaṣṭaṃ svacchaprakṛtinirmalam||89||
vidhūtakalpanājālaviṣpraṣṭaśuddhacetasāṃ|
yogināñca tathā jñānaṃ prajñānirmaladarpaṇaiḥ||90||
sūryakāntisamāśliṣṭasūryakāntamaṇau yathā|
sahasā prajvalatyagniḥ samathaḥ svārthasādhane||91||
apāstakalpanājālaṃ sūryakāntanibhaṃ manaḥ|
prajñāsūryāṃ śusaṃśliṣṭaṃ tadvajjvalati yoginām||92||
kāṣṭhadvayanigharṣeṇa yathā jvalati pāvakaḥ|
ādimadhyāntasaṃśuddhaḥ sarvavastuprakāśakaḥ|
prajñopāyasamāyogādyogijñānaṃ tathā viduḥ||93||
yathaivaikaḥ pradīpo'yaṃ varttyantarasamāśritaḥ|
yathāsvārthaṃ yathāsthānaṃ karotyuccaiḥ prakāśanam||94||
sphuraṇānantamūrtistu prajñopāyavibhāvanaiḥ|
nānādhimuktasattvānāṃ yathākṛtyamanuṣṭhayet||95||
vidhi jñohi yathā kaścitkṣīrādamṛtamuddharet|
nirdoṣaṃ śītalaṃ hṛdyaṃ sarvavyādhivināśanam||96||
prajñākṣīramahopāyādvidhivanmathanotthitaḥ|
viśuddhadharmadhātuḥ sa sukhāsukhavināśanaḥ||97||
yathā latā samudbhūtā phalapuṣpasamanvitā|
tathaikakṣaṇasambodhiḥ sambhāradvayasaṃyutā||98||
[vaśadveṣagatistambha] varṣaṇākarṣaṇādikam|
madyamāṃsarato yogī kurvannāpyupalipyate||99||
[hastakaṅkaṇabimbāya ki] mādarśaḥ samīkṣyate|
mahāyāne yato'dyāpi mantrasāmarthyadarśanam||100||
mātṛduhitṛsambandha [stattvato'tra na kalpyate|
bhagnāyodhūpavarttīva] jagadāha tathāgataḥ||101||
pañcabhūtātmakaṃ śukraṃ śoṇitañcāpi tādṛśam|
tanmayaḥ khalu piṇḍo'yaṃ ko vipraḥ kaśca vāntyajaḥ||102||
[pañcaskandhātmakaṃ sarvaṃ] śarīraṃ khalu bhikṣavaḥ|
anityaṃ duḥkhaśūnyañca na jātirna ca jātimān||103||
kaivarttīgarbhambhūtaḥ kaściñcā [ṇḍālajātimān |
tapasā brāhmaṇo jātastasmājjātirakāraṇam||104||
svasāraṃ mātaraṃ śvaśrūṃ svaputrīṃ bhāgineyikām|
brāhmaṇīṃ kṣatriyāṃ vaiśyāṃ vidhijñānena śūdrikām]||105||
ekāṅgavikalāṃ hīnāṃ garhītāmantyajāmapi|
yoṣitaṃ pūjayennityaṃ jñānavajraprabhāvanaiḥ||106||
[sarvadā smitavakreṇa mantravistṛtacakṣuṣā|
sambodhau cittamutpādya svādhidaivatabhāvataḥ||107||
paśyeddṛśyaṃ kṣaṇaṃ kiñcicchotavyaṃ śṛṇuyāttathā|
satyāsatyaviyuktaṃ tu vadedvākyamatandritaḥ]||108||
snānābhyañjanavastrādikhānapānādiyantataḥ|
svādhidaivatayogena cintayetpūjanāvidhim||109||
[gītaṃ vādyaṃ tathā nṛtyaṃ sopāyena vratī bhajet|
akurvanniha bhāveṣu sarveṣvabhiniveśanam||110||
svātmabhāvaprahāṇena tāpayenna tapasyayā]|
sukhādyathā sukhaṃ dhyāyetsambuddho'yamanāgataḥ||111||
sarvakāmopabhogaistu ramatha muktito'bhayāt|
mā bhaiṣṭa nāsti vaḥ pāpaṃ samayo duratikramaḥ||112||
mantrasaṃskṛtakāṣṭhādi devatvamadhigacchati|
kiṃ punaḥ jñānavān kāyaḥ kaṣṭaṃ mohaviceṣṭitam||113||
prākṛtatvamahaṅkāraṃ parityajya samāhitaḥ|
prajñopāyavidhānena kriyāmimāṃ samācaret||114||
paṅkajātaṃ yathā padmaṃ paṅkadoṣairna lipyate|
vikalpavāsanādoṣaistathā yogī na lipyate||115||
[vikalpo vimbasaṅkāśo dṛṣṭidoṣairna lipyate|
anbhasā lipyate naiva yadvadudakacandramāḥ]||116||
anādivāsanāpaṅkairviliptaṃ cittaratnakam|
prajñopāyajalenaiva [kṣālitaṃ samprakāśate]||117||
svādhidevatayogasya sthiracittasya dhīmataḥ|
muktaḥ kudṛṣṭimeghaiśca bhāsate cittabhāskaraḥ||118||
[prajñālakṣmaparicchede bhūtārthasya viniścayāt|
dharmadhāturupādeyo'vidyāvyatyayavarjanāt||119||
prajñāmudgaravidhvaste] sahasā kalpanāghaṭe|
prakṛtyā nirmalaḥ svaccho jñānadīpaḥ prakāśate||120||
suprasiddhāni bhūtāni kṣityagnijalavāyavaḥ|
kriyante hyanyathā vijñairmantrasāmarthyayogataḥ||121||
sarvavādaṃ parityajya mantravādaṃ samācaret|
yasya mantrasya sāmarthyātsaukhyabhāvo'pi sidhyati||122||
triratnaṃ na parityājyaṃ bodhicittaṃ tathā guruḥ|
na vadhyāḥ prāṇinaḥ ke'pi samayānyapyadhiṣṭhayet||123||
madhu raktaṃ sakarpūraṃ raktacandanayojitam|
munivajrodakaṃ caiva pañcaitānyapyadhiṣṭhayet||124||
anyaiśca samayairdivyaiścittasyotkarṣakārakaiḥ|
mārutakṣobhaśāntyarthaṃ prīṇayeccittavajrakam||125||
[nāśucibhāva āśaṅkyo'vikalpyayogalīlayā|
samāyuktena cittena mantrī sarvaṃ samācaret]||126||
makṣikāpadamātreṇa viṣeṇāpyabhibhūyate|
aṇumātrā ghṛṇā śaṅkā mṛtyukaṣṭena saṃyutā||127||
suyuddhaṃ vācaredvijñaḥ supalāyanameva vā|
āntarālikabhāvastu vyartho vai patanaṃ bhavet||128||
gurorājñāñca mudrāñca chāyāmapi na laṅghayet|
guṇāstasya paraṃ grāhyā doṣā naiva kadācana||129||
ācāryaḥ paramo devaḥ pūjanīyaḥ prayatnataḥ|
svayaṃ vajradharo rājā sākṣādrūpeṇa saṃsthitaḥ||130||
yathodakamaṇiḥ śuddhaḥ kaluṣodakaśodhakaḥ|
śraddhāmaṇistathā proktaścittaratnaviśodhakaḥ||131||
śraddhāvānmuhyate ko'pi prajñācakṣurvivarjitaḥ|
utpādayedataḥ prajñāmāgamādhigamātmikām||132||
śrāddho bahuśrutaḥ prājñaḥ prakṛtyā karuṇātmakaḥ|
jagadduḥkhavināśāya sukhopāyaṃ sa vindati||133||
cittaviśuddhimādhāya yanmayopārjitaṃ sukham|
cittaviśuddhimādhāya tenāstu sukhito janaḥ||134||
|| kṛtiriyamāryadevapādānāmiti||